Lögreglan í Mexíkóborg skýrði frá því í gær að hún hefði lagt hald á 1,6 tonn af kókaíni og er þetta mesta magn kókaíns sem lögreglan í borginni hefur nokkru sinni lagt hald á. Fjórir hafa verið handteknir vegna málsins og eru þeir grunaðir um að tengjast Sinaloa-eiturlyfjahringnum.

Omar Garcia Harfuch, yfirmaður öryggisdeildar lögreglu borgarinnar, skýrði frá þessu.

Kókaínið fannst í leynilegum hólfum flutningabíla á hraðbraut í útjaðri borgarinnar.

Talið er að efnið hafi komið með skipi frá Kólumbíu til Puerto Escondido sem er í um 12 klukkustunda akstursfjarlægð frá höfuðborginni.

Harfuch sagði að líklega hafi átt að selja hluta af efnunum í Mexíkóborg en restin hafi líklega átt að fara til Bandaríkjanna.