Töluvert var að gera hjá lögreglu á höfuðborgarsvæðinu í gærkvöld og nótt og voru allmörg mál skráð í dagbók lögreglu.

Málin eru ekki öll mjög alvarleg. Þannig voru höfð afskipti af drukkinni konu á reiðhjóli í hverfi 113 kl. hálfellefu í gærkvöld. Var konan handtekin vegna gruns um að stýra reiðhjóli drukkin. Var hún færð á lögreglustöð en látin laus að lokinni skýrslutöku.

Á öðrum tímanum í nótt voru höfð afskipti af manni sem var til vandræða á veitingastað í hverfi 108. Var maðurinn með hótanir og sagður vera með hníf. Hann er grunaður um vörslu fíkniefna og voru efni og hnífur haldlögð, Var vettvangsskýrsla rituð.

Tilkynnt var um umferðaróhapp við Heiðmerkurveg á ellefta tímanum í gærkvöld. Þar hafði bíl verið ekið á tré og síðan skilinn eftir og ökumaðurinn farinn af vettvangi, Krókur kom á vettvang og flutti bílinn burtu.

Um hálfníu í gærkvöld voru afskipti höfð af tveimur konum í verslun í Kópavogi vegna búðarþjófnaðar. Voru þær að yfirgefa verslunina með fjögur ilmvatnsglös fyrir tæpar 60.000 krónur er þær voru stöðvaðar. Öryggisvörður tók ilmvatnið og óskaði eftir lögreglu á vettvang.

Upp úr hálfsex í gær var tilkynnt um þjófnað úr verslun í hverfi 108.  Maður í annarlegu ástandi var til vandræða í versluninni og var starfsfólk búið að taka af honum vörur sem hann var búinn að setja innan klæða. Manninum hafði síðan verið vísað út en hann kom aftur og hélt áfram að setja varning í vasa sína. Maðurinn yfirgaf síðan verslunina en lögregla handtók hann skömmu síðar. Maðurinn var færður á lögreglustöð og vistaður sökum ástands í fangageymslu lögreglu.

Maður féll af rafmagnshlaupahjóli laust fyrir miðnætti í Hafnarfirði. Fékk hann höfuðhögg við fallið og mögulega heilahristing. Var hann fluttir á Bráðadeild með sjúkrabíl.