Jesse Lingard, leikmaður Manchester United, hefur sætt sig við að hann muni yfirgefa félagið að yfirstandandi tímabili loknu. BBC segir frá.

Lingard rennur út á samningi í júní og Newcastle, AC Milan, Juventus og Paris Saint-Germain hafa öll áhuga á fyrrum enska landsliðsmanninum.

Sagt var frá því að Erik ten Hag, verðandi knattspyrnustjóri United, hefði áhuga á að ræða við Lingard um framtíð leikmannsins hjá félaginu en samkvæmt BBC Sport hefur Lingard engan áhuga á að tala við Hollendinginn.

Nokkur félög höfðu áhuga á að fá Lingard í sínar raðir, bæði í janúarglugganum og í sumarglugganum í fyrra, en United neitaði að leyfa Lingard að fara.

Bæði Ole Gunnar Solskjaer, fyrrum knattspyrnustjóri liðsins og Ralf Rangnick, bráðabirgðastjóri, lofuðu miðjumanninum að hann fengi tækifæri til að keppa um byrjunarliðssæti en leikmaðurinn hefur aðeins byrjað tvo deildarleiki á tímabilinu og var niðurlútur á mánudaginn eftir 3-0 sigur United á Brentford í síðasta heimaleik liðsins á tímabilinu.

Lingard fékk ekki að koma inn á og kveðja stuðningsmennina en hann hefur verið hjá United síðan hann var sjö ára gamall. Bróðir hans var öskureiður vegna þessa og sendi frá sér færslu á samfélagsmiðlum: „Tuttugu ár af blóði, svita og tárum. Fjórir titlar, þrír bikarúrslitaleikir. Fær ekki einu sinni að kveðja,“ sagði hann.

Tvö þeirra félaga sem hafa áhuga á Lingard eru sögð komin langt í viðræðum um samning við Englendinginn.