Leiða má líkum að því að Vladímír Pútín, Rússlandsforseti, sé mjög ósáttur við gengi rússneska innrásarliðsins í Úkraínu en því fer víðs fjarri að hernaður Rússa hafi gengið eins og lagt var upp með. Það hefur komið fram í erlendum fjölmiðlum að líklega hafi Pútín ekki fengið réttar upplýsingar um getu rússneska hersins og varnarmátt Úkraínumanna áður en hann gaf fyrirmæli um innrás. Nú virðist sem hann sé farinn að láta reiði sína í ljós að minnsta kosti er búið að handtaka háttsetta menn innan leyniþjónustunnar og víkja herforingjum frá störfum.

Á föstudaginn var Sergei Beseda, yfirmaður erlendrar deildar FSB leyniþjónustunnar, handtekinn og settur í stofufangelsi ásamt staðgengli sínum Anatoly Bolyukh. Þetta kemur fram í skrifum tveggja rússneskra rannsóknarblaðamanna fyrir hugveituna Center for European Policy Analysis (Cepa). Fram kemur að mennirnir séu sakaðir um að hafa misfarið með fé sem var eyrnamerkt ákveðnum verkefnum og að hafa skilað lélegum stöðuskýrslum fyrir innrásina.

The Times hefur sömu sögu að segja og hefur eftir heimildarmönnum. Þar á meðal eftir Vladimir Osechkin, sem er rússneskur baráttumaður fyrir mannréttindum, sem er í útlegð í Frakklandi. Hann segir að FSB hafi gert húsleit hjá tuttugu liðsmönnum leyniþjónustunnar en þeir eru grunaðir um að hafa rætt við fjölmiðla.

Cepa segir að Beseda hafi borið ábyrgð á upplýsingaöflun um Úkraínu fyrir innrásina. FSB starfar aðeins innanlands, það er að segja opinberlega, en í lok tíunda áratugarins, þegar Pútín var yfirmaður FSB, var fimmtu deildinni komið á laggirnar innan leyniþjónustunnar en verkefni hennar er að starfa í ríkjum sem áður voru hluti af Sovétríkjunum. FSB hefur síðan tekið þátt í að berja mótmæli almennings niður og tryggja áhrif Rússa í ríkjum sem áður voru hluti af Sovétríkjunum.

En það er ekki bara innan leyniþjónustunnar sem hreinsanir virðast hafnar því á fimmtudaginn sagði Oleksiy Danilov, yfirmaður úkraínska öryggisráðsins, að „um átta“ rússneskir herforingjar hafi verið reknir síðan innrás Rússa í Úkraínu hófst þann 24. febrúar. Vestrænar leyniþjónustustofnanir hafa ekki staðfest þetta en hugsanlega má tengja þetta við breyttar bardagaaðferðir rússneska hersins sem hefur nú umkringt fleiri borgir og bæi og hert árásir sínar á þá. Sprengjum er látið rigna yfir bæi og borgir án tillits til hvort um hernaðarleg skotmörk er að ræða eður ei.

Institute for the Study of War segir að Pútín virðist vera að hreinsa til meðal æðstu yfirmanna hersins og leyniþjónustunnar og endurskipuleggja hernaðinn í Úkraínu og gera ráð fyrir miklu lengri hernaðaraðgerðum en reiknað var með í upphafi.