Bandarísk stjórnvöld hafa gripið til harðra refsiaðgerða gegn Rússum vegna innrásar þeirra í Úkraínu. Aðgerðunum er beint að rússneska ríkinu, ráðamönnum og elítu landsins, þar á meðal hinum svokölluðu olígörkum. Í stefnuræðu sinni á bandaríska þinginu hét Joe Biden, forseti, því að sérstakur vinnuhópur myndi kortleggja hvaða eignir rússnesku olígarkarnir eiga víða um heim og banna rússneskum flugvélum að koma í bandaríska lofthelgi. „Við munum ná ykkur,“ sagði Biden í ræðu sinni.

En nú er komið fram að það er nú hægara sagt en gert. Eitt er að loka lofthelginni fyrir rússneskum farþegaflugvélum, annað er að loka henni fyrir einkaþotum olígarkanna.

Vandinn liggur í lélegri skráningu bandarískra yfirvalda á rússneskum olígörkum og eignum þeirra. Frá 2017 hefur þingið ítrekað reynt að knýja í gegn breytingar á skráningum flugvéla til að auka öryggi þeirra. En bandarísk flugmálayfirvöld hafa ekki verið hrifin af þessu að sögn Stephen F. Lynch, þingmanns Demókrata. Í samtali við Washington Post sagði hann að með núverandi skráningarkerfi muni yfirvöld aldrei uppgötva ef meðlimur í mexíkóskum fíkniefnahring skrái flugvél í Bandaríkjunum. Af sömu ástæðu sagðist hann efast um að aðgerðir Biden skili miklum árangri.

ESB hefur einnig lokað lofthelgi sinni fyrir rússneskum flugvélum en þar er svipað vandamál uppi á teningnum. Til að hægt sé að láta bannið ná yfir olígarkana þurfa yfirvöld að starfa miklu nánar saman en nú er gert.

Í hinum svokölluðu Panamaskjölum frá 2018 kemur fram að fjöldi rússneskra olígarka hafi árum saman svikið evrópsk skattyfirvöld um tugi milljarða með því að skrá flugvélar sínar í skattaskjólinu á Isle of Man. Í mörgum tilfellum var þetta gert með því að olígarkarnir leigðu vélarnar af sjálfum sér í gegnum huldufyrirtæki sem útilokað var að rekja slóðina eftir. Sömu aðferðum var beitt við lúxussnekkjur olígarkanna.