Myndbandið, sem er hægt að horfa á hér fyrir neðan, nístir svo sannarlega í hjartastað. Það sýnir eina birtingarmynd stríðs vel, þau áhrif sem það hefur á börn. Á myndbandinu sést lítill úkraínskur drengur grátandi og einn á gangi í pólska landamærabænum Medyka á laugardaginn.

Hann er með bakpoka og bangsa og grætur hástöfum. Sky News segir að ekki sé vitað hvort hann hafi verið einn á ferð.

Á fyrstu 12 dögum stríðsins flúðu 1,7 milljónir Úkraínumanna land, þar af rúmlega milljón til Póllands. Flestir flóttamannanna eru konur og börn og gamalt fólk. Karlmennirnir mega ekki yfirgefa Úkraínu og eiga að leggja sitt af mörkum í baráttunni við rússneska innrásarherinn.