Eftirspurn eftir innlögn á sjúkrahúsið Vog hefur aukist síðustu mánuði og eru nú um 750 manns sem óska eftir meðferð.

„Á þessum tveimur árum sem einkennst hafa af heimsfaraldri vegna Covid-19, skertri þjónustu vegna sóttvarna og fjöldatakmarkana, sést að vandi þeirra sem fengu tækifæri til að leggjast inn á Vog hefur verið alvarlegri en áður. Um er að ræða meiri daglega drykkju, meiri neyslu ópíóíða og hærra hlutfall þeirra sem hafa sprautað ópíóíðum í æð, samanborið við árin fyrir Covid-19.  Mikilvægi þess að standa vörð um þjónustu til fólks með fíknsjúkdóm hefur sjaldan verið meira og nú þegar loks hillir undir endalok þessa veirufaraldurs, enda heimsfaraldur fíknsjúkdóms enn í mikilli útbreiðslu,“ segir í tilkynningu frá SÁÁ.

Þá kemur fram að dregið hafi úr innlögnum á árinu 2020, á fyrra ári Covid. „Færri komu í fyrstu innlögn þótt aðgengi þeirra væri óheft. Fyrst og fremst fækkaði í aldurshópnum yngri en 40 ára. Fleiri voru lagðir inn á síðasta ári (2021) og fjölgaði heildarinnlögnum um tíund milli ára. Þeim sem koma í fyrsta sinn fjölgaði aftur um 14% frá árinu áður. Þessi fjölgun virðist skila sér nokkuð jafnt í öllum aldurshópum, en áfram fækkar innlögnum í yngsta hópnum 19 ára og yngri og er það fagnaðarefni. Sérstaklega hefur verið hugað að snemmtæku inngripi fyrir ungmenni 25 ára og yngri með fíknsjúkdóm og er fækkunin því ekki vegna skerðingar á aðgengi í Covid,“ segir í tilkynningunni.

Þá kemur fram að þrátt fyrir miklar almennar raskanir í samfélaginu og heilbrigðisþjónustunni allri vegna Covid-19 þessi síðastliðnu tvö ár hafi tekist að halda úti öflugu meðferðarstarfi á sjúkrahúsinu Vogi og mikil áhersla verið lögð á að halda sjúkrahúsinu opnu þrátt fyrir fjöldatakmarkanir og íþyngjandi sóttvarnaraðgerðir.