Hann er margvíslegur lággróðurinn á alnetinu og margt gert til að villa um fyrir fólki og rugla umræðuna. Hér er til dæmis vefsvæði á Facebook sem nefnist Stríðið í Miðausturlöndum. Á þriðja þúsund manns fylgist með þessu og sumir gera það örugglega í góðri trú. Ég sé að 84 Facebook- vinir mínir eru í hópnum sem líkar síðan.

Þetta eru sömu aðilar og hafa beitt sér fyrir því að þýða bók sem nefnist Stríðið gegn Sýrlandi eftir ástralskan furðufugl, Tim Anderson að nafni, en hann gefur sig út fyrir að vera sérfræðing um stríðið í Sýrlandi. Anderson er samherji Vanessu Beeley sem kom hér á dögunum og hélt erindi á vegum Ögmundar Jónassonar. Þarna eru margir einstaklingar yst af vinstri væng stjórnmálanna.

Þau tvö bar á góma í þættinum Þjóðbraut á sjónvarpsstöðinni Hringbraut um daginn. Þá sagði Ólöf Ragnarsdóttir sem hefur kennt arabísku og sögu Sýrlands við Háskóla Íslands:

Svo það komi fram tekur enginn fræðimaður mark á þessari konu og bókinni sem var verið að þýða á íslensku, það tekur enginn mark á þeim og veit enginn hver hann er.

En það er margt sérkennilegt á þessum vef. Jú, kannski er inn á milli hægt að finna eitthvað sem vitglóra er í. Þarna kemur fram stuðningur við Kúrda til að mynda. En svo kemur svona furðuspuni þar sem Bashar al Assad, fjöldamorðinginn sem situr í stóli Sýrlandsforseta, er kallaður „geðþekkur augnlæknir“.

Kæmi kannski ekki að sök ef svo margt fólk sem er að leita upplýsinga væri ekki að fylgjast með þessu. Þarna er alið á því sem var fjallað um hér í pistli um daginn og kallast upplýsingaóreiða.