Guðmundur Birkir Pálmason, kírópraktorinn landsþekkti sem gengur undir nafninu Gummi Kíró, hefur hótað Birni Hákoni Sveinssyni sjúkraþjálfara að tilkynna hann til Landlæknis ef að hann „taggar“ aftur fyrirtæki sitt, Kírópraktorstöð Reykjavíkur, í færslur sínar á Instagram. Samskipti heilbrigðisstarfsmannanna hafa vakið talsverða athygli á samfélagsmiðlinum og virðist sjúkraþjálfarinn taka hótunum Guðmundar mátulega alvarlega.
Forsaga málsins er sú að Björn Hákon, sjúkra- og styrkarþjálfari, heldur úti vinsælum Instagram-reikningi undir nafninu Sjúkrabjörn þar sem hann birtir margskonar fróðleik um æfingar, þjálfun og öllu sem því tengist. Björn Hákon er einnig iðinn við að benda á margskonar villandi upplýsingar um sérgrein sína, sérstaklega þegar slíkar upplýsingar eru notaðar til að pranga vörum eða þjónustu upp á grunlausa viðskiptavini.
Í vikunni fjallaði Björn Hákon um heimildahrúgun (e. Cititation Dump) sem í einfölduðu máli snýst um að færð eru rök fyrir einhverjum vafasömum fullyrðingum með því að vísa í allskonar heimildir eða rannsóknir máli sínu til stuðnings. Tilgangurinn er sá að freista þess að lesendur taki fullyrðingunum sem sannleik en þegar betur er að gáð styðja heimildirnar ekki fullyrðinguna á nokkurn hátt eða þá að rannsóknirnar standist ekki vísindalegar kröfur. Í þræðinum sagði Björn Hákon að sem betur fer væri fólk sífellt að verða læsara á slíkar blekkingar.
Angi af því er einnig sá að fólk er farið að krefjast tilvísana í heimildir þegar að fyrirtæki, sérstaklega í heilbrigðisgeiranum, fullyrða eitthvað.
Björn Hákon tók sem dæmi póst á Instagram-síðu Kírópraktorstöðvar Reykjavíkur þar sem fullyrt var að fimm ástæður bakverkja væri eftirfarandi:
Sagði sjúkraþjálfarinn að upplýsingarnar væru rugl og máli sínu til stuðnings benti hann á samantektarrannsókn þar sem niðurstöður 25 rannsókna voru dregin saman. Þá væru fimm helstu þættir sem geta spáð fyrir um hvort einstaklingur upplifi bakverki um ævina eftirfarandi:
Benti hann á að niðurstöður rannsóknanna væru langt frá því sem að Kírópraktorstöð Reykjavíkur héldi fram og furðaði sig á framgöngu stofunnar sem hann taggaði í þræði sínum.
Gummi Kíró er framkvæmdastjóri Kírópraktorstöðvar Reykjavíkur. Óhætt er að fullyrða að umfjöllun Björns Hákons hafi farið öfugt ofan í Gumma sem sendi honum kaldar kveðjur og hótaði að kæra hann til Landlæknis fyrir Instagram-taggið.
„Hahaha, alltaf sama minnimáttarkenndin í ykkur! Ég svara oftast ekki svona „kommentakerfisskrifum“ einstaklinga sem eiga erfitt með að sjá heildarmyndina. Kannski vantar fólki sjálfstraust í starfi og taka óöryggi sitt út á öðrum,“ skrifar Guðmundur.
Hann fullyrðir svo að rannsóknirnar séu svo sannarlega til staðar en að það hafi ekkert upp á sig að birta slíkt því enginn myndi nenna að lesa slíkt og þar með væri til lítils unnið.
„Að kalla þetta falskar upplýsingar er í raun fáfræði og minnimáttarkennd að koma fram,“ skrifaði Guðmundur.
Hann klikkti svo út með því að hóta að tilkynna Björn Hákon til Landlæknis.
„Gangi þér vel í öllu sem þú getir en ef þú taggar aftur fyrirtæki okkar á samfélagsmiðlum án leyfis þá tilkynni ég það okkar yfirmanni, Landlækni, sem heimilar ekki slíkt,“ skrifar Guðmundur ósáttur.
Ekki er hægt að segja að Björn Hákon taki þessari hótun Guðmundar alvarlega. Auk þess að rífa í sig skeyti hans lið fyrir lið þá birti hann í lok færslu sinnar eftirfarandi grínmynd.
