Samkvæmt frétt Mirror þá var það snemma að morgni 20. nóvember 2019 sem Smith handsamaði Wiltshire, sem hann grunaði að væri innbrotsþjófur, og hélt honum föstum í níu mínútur með því að hvíla hné sitt á baki hans. Hann neitaði að fjarlægja hnéð þrátt fyrir að Wiltshire hafi tvisvar sagt honum að hann næði ekki andanum. „Mér er skítsama um hvað þú getur eða getur ekki,“ sagði Smith.
Wiltshire lést á sjúkrahúsi 4. desember, tveimur vikum eftir handtökuna.
Fyrir dómi neitaði Smith sök og sagðist hafa talið að Wiltshire væri „þykjast“ eiga í öndunarörðugleikum til að hann myndi sleppa honum.
Wiltshire var grunaður um að standa á bak við fjölda þjófnaða og innbrota í úthverfi Bristol þar sem Smith starfaði. Þrátt fyrir fjölda tilkynninga til lögreglunnar þá rannsakaði hún málin aldrei af neinum krafti og handtók Wiltshire aldrei.
Krufning leiddi í ljós að Wiltshire var með diazepam og methadon í blóðinu og að hann var með undirliggjandi hjartasjúkdóm.
Smith sagðist ekki hafa vitað að Wiltshire væri með hjartasjúkdóm og því í aukinni hættu á að fá hjartaáfall. Hann sagðist heldur ekki hafa vitað að það væri hættulegt að halda einhverjum niðri með þessu hætti í langan tíma.
Kviðdómur sýknaði Smith af ákæru um manndráp í gær. Kviðdómnum var sagt að líta svo á að Wiltshire væri maðurinn sem hafði herjað á hverfið með innbrotum og þjófnuðum og að ekki hafi verið um mistök að ræða þegar Smith handsamaði hann.
