Það eru mjög litlar líkur á að þú fáir hjartaáfall á meðan á samförum stendur. Þetta eru niðurstöður nýrrar rannsóknar. Í henni fóru vísindamenn yfir mörg þúsund hjartastopp sem leiddu til andláts. Í ljós kom að aðeins í 0,2% tilfella varð hjartaáfallið á meðan á samförum stóð eða innan einnar klukkustundar eftir þær.

MedPage Today skýrir frá þessu og byggir á niðurstöðum rannsóknarinnar sem hafa verið birtar í vísindaritinu Jama Cardiology.

Rannsóknin byggir á ítarlegri yfirferð á breskum gagnagrunni með upplýsingum um 6.847 óvænt hjartaáföll og andlát af þeirra völdum frá 1994 til 2020.

Niðurstöður rannsóknarinnar sýna að örsjaldan er hægt að tengja skyndilegt hjartaáfall og andlát við samfarir. Eins og fyrr sagði þá gerðist slíkt aðeins í 0,2% tilfella og er þá átt við hjartaáfall á meðan á samförum stendur eða innan klukkustundar eftir að þeim lauk.

Þetta voru 17 andlát. Meðalaldur hinna látnu var 38 ár og tveir þriðju þeirra voru karlar.

Vísindamennirnir segja að niðurstöðurnar geti verið gagnlegar því fólk, sem glímir við hjarta- og æðasjúkdóma, geti haft áhyggjur af tengslum samfara og hættunnar á að fá hjartaáfall. „Við teljum að niðurstöðurnar veiti visst öryggi fyrir að það er mjög öruggt að stunda kynlíf þótt fólk glími við hjartavandamál, sérstaklega fyrir þá sem eru yngri en fimmtíu ára,“ segir í rannsókninni.