Alma Möller landlæknir gerir skaðsemi ofneyslu á orkudrykkjum ungmenna að umtalsefni í aðsendri grein í Fréttablaðinu í dag.
„Undanfarin ár höfum við orðið vör við mikla neyslu orkudrykkja meðal einstaklinga undir 18 ára og sýna íslenskar rannsóknir að stór hópur (31-38%) ungmenna á aldrinum 13-17 ára fer yfir viðmiðunarmörk (1,4 mg/kg) fyrir neikvæð áhrif á svefn. Að meðaltali nemur neysla orkudrykkja rúmlega helmingi af koffínneyslu framhaldsskólanema en þar á eftir koma gosdrykkir og kaffi (20% hvort),“ segir Alma.
Hún bendir á að börn og unglingar séu sérstaklega viðkvæm þar sem þau eru almennt léttari en fullorðið fólk og sama magn hefur þannig meiri áhrif á þau. „Samkvæmt nýlegri skýrslu Áhættumatsnefndar ætti að takmarka aðgengi þessa aldurshóps að orkudrykkjum,“ segir hún.
Alma bendir ennfremur á að þegar við höfum innbyrt koffín þá tekur það flesta um fjóra til átta tíma til að losna við helminginn af koffíninu úr líkamanum, en lengri tíma fyrir unglinga og barnshafandi konur.
„Sumir orkudrykkir hafa verið markaðssettir sem eins konar heilsudrykkir sem gefur ranga mynd í ljósi þeirra neikvæðu áhrifa sem mikil neysla þeirra getur haft á okkur. Svefn er til að mynda öllum mikilvægur til að geta tekist á við verkefni dagsins og hefur jákvæð áhrif á ónæmiskerfi, námsgetu, andlega líðan sem og vöxt og þroska barna,“ segir Alma.
