Ólafur Björgvin Hermannsson var í gær dæmdur í 15 mánaða fangelsi í Héraðsómi Reykjavíkur fyrir fjölmörg brot.
Einna alvarlegasta brotið er innflutningur á tæplega hálfu kílói af amfetamíni í lok ágústmánaðar árið 2021. Efnin fundust í pakkningu í ferðatösku hans við komu til landsins frá Amsterdam í Hollandi.
Ólafur var einnig ákærður fyrir árás á lögreglumenn sem hugðust handtaka hann. Var hann sagður hafa sparkað í lögregluþjóna og kastað gasgrilli í áttina að þeim með þeim afleiðingum að þeir hlutu mar á fótleggjum. Þurfti að sprauta varnarúða í augu Ólafs til að yfirbuga hann. Lögreglumenn sem gáfu skýrslu fyrir dómi segjast hafa óttast Ólaf við handtökuna enda hafi hann verið mjög ógnandi.
Ólafur var hins vegar sýknaður af þessari ákæru.
Ákærurnar voru alls fjórar en sumar eru í nokkrum liðum, eru það aðallega umferðarlagabrot þar sem Ólafur var sakaður um akstur undir sterkum áhrifum vímuefna. Var hann sviptur ökuleyfi ævilangt auk fangelsisdómsins.
