„Ef það var glæpur sem við frömdum er fullt eins líklegt að það sé glæpur sem við erum að fremja núna því við erum með raðgreiningunni að afla gagna sem við setjum í samhengi til þess að sækja nýja þekkingu og aðstoða þannig sóttvarnaryfirvöld í baráttunni við veiruna.“
Í samtali við mbl.is í kvöld segir Kári að starfsmenn ÍE hafi lagt allt í sölurnar, unnið dag og nótt við að þjónusta sóttvarnayfirvöld til að hjálpa til við baráttuna við veiruna. Fyrirtækið hafi ekkert fengið í staðinn.
Kári telur Persónuvernd hafa farið út fyrir valdsvið sitt með úrskurðinum, að stofnunin taki sér vald sem henni sé ekki ætlað og að hún hafi ekki tekið tillit til þeirra fordæmulausu stöðu sem uppi hefur verið í samfélaginu frá því að kórónuveiran nam hér land.
„Persónuvernd kemst að þeirri niðurstöðu að þetta hafi ekki verið gert vegna sóttvarna, heldur til að vinna vísindarannsókn. Í fyrsta lagi er það ekki hlutverk Persónuverndar í íslensku samfélagi að ákveða hvað eru sóttvarnir; Það er ekki hlutverk Persónuverndar að ákveða hvenær menn eru að vinna að sóttvörnum.“
Kári veltir fyrir sér hvaða hagsmuna sé verið að gæta með úrskurðinum.
„Hvaða hagsmuni er verið að verja með þessu? Við lögðum allt í sölurnar, til að hlúa að sóttvörnum á Íslandi, við fengum ekkert fyrir það annað en að við vorum að hlúa að okkar samfélagi. Í þessu felst svo mikil mannfyrirlitning að það er alveg með ólíkindum. Þetta er ekki ósmekklegt, þetta er ógeðslegt.“
Helga Þórisdóttir, forstjóri Persónuverndar, segir að stofnunin standi við niðurstöðuna sem sé að þeirra mati lagalega rétt. Hún sagði í samtali við RÚV í gær að fólk þurfi að vita þegar það er gert að virkum þátttakanda í vísindarannsókn. „Þannig var það ekki. Það var farið af stað og tekið blóð úr bæði inniliggjandi sjúklingum og að því er virðist öðrum sem komu vegna COVID til spítalans. Það er þar sem við stöldrum við og setjum niður okkar fót.“
