Lögreglan á höfuðborginni hefur nú staðfest að dularfulli hluturinn sem fannst í ruslagámi húss við Mánatún í Reykjavík í gær hafi verið sprengja.

Sérsveit ríkislögreglustjóra kom að málinu.

Þetta kemur fram í stuttri tilkynningu lögreglunnar sem send var fjölmiðlum rétt í þessu. Fram kom í fjölmiðlum í gær að grunur væri uppi um að málið tengdist sendiherrabústað bandaríska sendiráðsins sem er þarna í næsta nágrenni við ruslagáminn. Lögreglan tekur nú af öll tvímæli um það, og segir málið ekki tengjast heimili sendiherrans.

Reyndar hefur enginn sendiherra verið á Íslandi frà því síðasti sendiherra Bandaríkjanna, sem skipaður var af Dónaldi Trump, hvarf af landi brott daginn eftir að Joe Biden sór embættiseið sinn þann 20. janúar síðastliðinn.

Tilkynningu lögreglunnar má sjá hér að neðan í heilu lagi.

Lögreglan á höfuðborgarsvæðinu staðfestir að hluturinn sem fannst í gær í ruslagámi við Mánatún reyndist vera heimatilbúin sprengja. Sérsveit ríkislögreglustjóra var kölluð til og sá hún um að tryggja vettvang og eyða sprengjunni. Ekkert hefur komið fram við rannsókn málsins sem bendir til þess að málið tengist sendiráði erlends ríkis. Tveir af mönnunum þremur sem handteknir voru í tengslum við málið hafa hafið afplánun vegna fyrri refsidóma en þriðja manninum hefur verið sleppt.

Rannsókn málsins miðar vel. Ekki verða veittar frekari upplýsingar um málið að svo stöddu.