Síðastliðna helgi deildi lögmaðurinn Telma Halldórsdóttir frásögn sem hún ritaði fyrir hönd Kristínar heitinnar vinkonu sinnar, sem lést langt fyrir aldur fram, í tengslum við #metoo-hreyfinguna og birtist árið 2017 ásamt fleiri frásögnum kvenna úr réttarvörslukerfinu, en Kristín hafði orðið fyrir grófri kynferðislegri áreitni á vinnustað og var sagt upp störfum í kjölfar þess að hún kvartaði undan áreitninni við yfirmann.

„Ég fékk sjálf sjokk þegar þessi maður stakk tungunni upp í eyrað á henni og greip í brjóstin á henni fyrir framan mig, allt samt svona „djók“. Hún fékk loksins nóg þegar hann skellti henni á skrifborðið hjá sér og ætlaðist til þess að hún svæfi hjá sér. Hennar viðbrögð fyrir utan sjokkið var að tala við sinn yfirmann sem var kona og greina frá áreitninni.”

DV greindi frá því að meintur gerandi í málinu væri fyrrverandi yfirlögfræðingur Landsvirkjunnar Helgi Jóhannesson og að brotið hefði átt sér stað er Helgi starfaði hjá lögmannsstofunni LEX. Í frásögninni segir enn fremur:

„En ekki leið á löngu þar til svipaðar sögur heyrðust af sama manni og öðrum starfsmönnum af stofunni. Það sem var hvað sárast í þessu öllu var að karlmenn úr stéttinni, menn sem við höfðum talið vini okkar, gerðu lítið úr henni, sögðu hana athyglissjúka og ljúga og því miður voru það ekki bara menn því þó nokkrar konur sögðu það sama.”

Sjá einnig: Þetta er #metoo sagan sem sögð er fjalla um fráfarandi yfirlögfræðing Landsvirkjunar – „Gerðu lítið úr henni, sögðu hana athyglissjúka og ljúga“

DV leitaði viðbragða framkvæmdastjóra LEX, Arnar Gunnarssonar, við þessari frásögn. Örn taldi ekki rétt að rifja upp málið þar sem um látna konu væri að ræða.

„Ég held ég geti lítið sagt. Þetta er náttúrulega bara látin manneskja sem að er erfitt að rifja upp um – vera að rifja eitthvað upp langt um liðið þannig að það væri bara ekki viðeigandi gagnvart hennar minningu að rifja eitthvað upp um það.“

Aðspurður um hvort að fleiri kvartanir um áreitni af hálfu Helga hafi borist stjórnendum LEX sagði Örn:

„Við erum ekki að svara spurningum um einstaka starfsmenn.“

Blaðamaður spurði hvort að LEX væri með viðbragðsáætlun hvað varðar kvartanir vegna áreitni eða kynferðisofbeldis og sagði Örn svo vera en vildi ekki senda afrit af áætluninni út úr húsi þar sem um innanhúsgagn væri að ræða.