Tónlistarmaðurinn Kanye West er tæknilega úr sögunni eftir að dómari í Los Angeles samþykkti beiðni hans um nafnabreytingu í dag. Nú heitir þessi þekkti rappari hreinlega „Ye“ og ber ekkert eftirnafn.
Ye sótti formlega um nafnabreytinguna í ágúst en tók formlega upp nafnið á Twitter-aðgangi sínum fyrir þó nokkru síðan. Ye er einnig nafnið á áttundu plötu rapparans sem kom út í júní 2018, það sama ár greindi hann frá því í viðtali að Ye kæmi úr biblíunni þar sem það þýði „þú“.
Það er óvíst hvaða afleiðingar nafnabreytingin mun hafa á viðskiptaveldi Ye eða á skilnað hans og eiginkonu hans, Kim Kardashian West og börn þeirra – en Kim og börnin bera eftirnafnið West sem Ye hefur nú löglega losað sig við.