Hæstiréttur Íslands dæmdi í dag Leikfélag Reykjavíkur til að greiða leikaranum Atla Rafni Sigurðarsyni 1,5 milljónir í miskabætur og 3 milljónir í málskostnað. Þetta kemur fram í frétt RÚV. Dómurinn hefur ekki verið birtur en fréttastofa RÚV hefur fengið staðfestingu um niðurstöðuna frá báðum aðilum máls.
Atla Rafni var sagt upp störfum við leikhúsið vegna ásakana um kynferðislega áreitni. Hann fékk aldrei að vita innihald ásakananna né hverjir ásakendur hans voru. Atli Rafn höfðaði í kjölfari mál á hendur Leikfélagi Reykjavíkur og Kristínu Eysteinsdóttur, þáverandi leikhússtjóra, á þeim forsendum að vinnuveitandi hans hafi ekki gert viðhlítandi rannsókn á ásökunum.
Í héraði voru Atla dæmdar 5,5 milljónir í skaðabætur en í Landsrétti var þeirri niðurstöðu snúið við. Atli fékk síðan heimild frá Hæstarétti til að áfrýja máli sínu gegn leikfélaginu en ekki gegn Kristínu.
