Tveggja ára barn liggur nú á gjörgæslu Landspítalans með COVID-19. Um er að ræða annað barnið hér á landi sem leggst inn á sjúkrahús vegna faraldursins og það fyrsta til að liggja á gjörgæslu. Vísir greinir frá.
Barnið er ekki í öndunarvél og er búist við að hægt sé að flytja það á almenna deild síðar í dag.
„Það er mjög skiljanlegt að hafa áhyggjur af börnunum sínum í kringum Covid. Ég hef sagt áður að þetta er sýking sem þarf að bera virðingu fyrir. Hins vegar er það þannig að í langflestum tilfellum er þetta mjög mildur og vægur sjúkdómur hjá börnum. Í raun og veru er engin ástæða til að vera óttaslegin yfir því,“ segir Valtýr Stefánsson Thors barnasmitsjúkdómalæknir í samtali við Vísi.