Kári Árnason landsliðsmaður Íslands í knattspyrnu og leikmaður Víkings mun taka að sér nýtt hlutverk í vetur þegar skórnir hans fara í hilluna. Þessi 38 ára leikmaður ætlar að hætta þegar tímabilið hjá Víkinga er á enda.
Kristján Óli Sigurðsson sem er einn vinsælasti sparkspekingur þjóðarinnar sagði frá því í gær að Kári væri að taka sér starf á skrifstofu Víkings.
„Hann er að verða yfirmaður knattspyrnumála í Víkinni,“ sagði Kristján á X977 í gær.
Kári mun starfa í kringum yngri flokka félagsins auk þess að starfa í kringum meistaraflokkana. Hann hafði áður lýst yfir áhuga á því að taka við starfi yfirmanns knattspyrnumála hjá KSÍ.
Kári hefur átt magnaðan feril sem knattspyrnumaður og spilað stórt hlutverk í mögnuðum árangri íslenska landsliðsins.