Óvíst er hvort lykilmennirnir Birkir Bjarnason og Jóhann Berg Guðmundsson geti tekið þátt í leik Íslands og Norður-Makedóníu.

Hvorugur þeirra æfði með liðinu í dag, degi fyrir leik. Sömu sögu er að segja um Mikael Neville Anderson.

„Ástandið á hópnum er alveg ágætt. Í dag voru þrír sem voru smá tæpir. Mikki fékk smá spark í kálfann frá Kára á æfingu í gær, ekkert alvarlegt þannig lagað bara að sjá til þess að það komi ekki blæðing inn á vöðvann,“ sagði Arnar Þór Viðarsson á fréttamannafundi í dag.

„Birkir og Jói að ná sér eftir leikinn gegn Rúmeníu. Það er það sama og hjá Mikka, varúðarástæðarnir í dag og svo tekin ákvörðun á morgun. Við sjáum hvort þeir geti byrjað, verið á bekknum eða ekki í hóp.“

Kári Árnason kveðst vera klár í slaginn eftir að hafa setið á bekknum gegn Rúmeníu, allar líkur eru á að hann byrji leikinn.