Flugfélagið PLAY hefur sent frá sér fréttatilkynningu þess efnis að frá og með morgundeginum muni félagið ekki fljúga með farþega til Íslands sem ekki geta framvísað neikvæðu COVID-19 prófi við innritun. Í tilkynningunni segir:

„Ákvörðunin er tekin með öryggi farþega og áhafna að leiðarljósi og í samræmi við reglugerð heilbrigðisyfirvalda sem tók gildi 27. júlí og kveður á um að farþegar þurfi að verða sér úti um vottorð um neikvætt COVID-19 próf áður en haldið er til Íslands.“

Þá segir enn fremur:

„PLAY mun bóka þá farþega sem ekki geta framvísað neikvæðu COVID-19 prófi í næsta flug félagsins frá sama áfangastað þeim að kostnaðarlausu, enda framvísi þeir þá neikvæðu prófi.“

PLAY segist ekki véfengja rétt Íslendinga til að snúa til heimalands síns en þeir sem ekki uppfylla sóttvarnareglur þurfi einfaldlega að sæta tímabundinni röskun:

„Með þessari tilhögun er PLAY ekki að bera brigður á rétt Íslendinga til að snúa til síns heima heldur þurfa þeir, sem ekki uppfylla reglur stjórnvalda, að sæta tímabundinni röskun í ljósi aðstæðna. Þá er ákvörðunin tekin í samræmi við skilmála PLAY þar sem meðal annars er kveðið á um heimild félagsins til að neita að fljúga með farþega sé það nauðsynlegt til að framfylgja lögum, reglugerðum eða tilmælum stjórnvalda eða til að tryggja öryggi annarra.

Jafnframt er það mat PLAY að ef flugrekandi framfylgir ekki reglum stjórnvalda, með því að hleypa fólki sem ekki framvísar COVID-19 prófi á flugvelli um borð í flug til landsins, missi reglurnar marks.

„Það er skylda okkar að tryggja öryggi farþega og áhafna og það kemur ekki til greina að PLAY hleypi fólki um borð án þess að reyna að tryggja að það sé ekki með COVID-19. Þetta er tímabundin ráðstöfnun í þágu öryggis,“ segir Birgir Jónsson forstjóri PLAY. “