Guðjón Pétur Lýðsson, leikmaður ÍBV, var í viðtali í útvarpsþættinum Fótbolti.net í gær. Þar ræddi hann meðal annars um það að þjóðhátíð í Vestmannaeyjum hafi verið aflýst, annað árið í röð.

Það stefndi í að þjóðhátið myndi snúa aftur í ár eftir að hafa fengið frí í fyrra vegna útbreiðslu kórónuveirunnar.

Ríkisstjórn Íslands ákvað hins vegar á föstudag að skella aftur á samkomutakmörkunum sem verða til þess að ekki verður hægt að halda hana, að minnsta kosti ekki á tilsettum tíma. Þjóðhátíð átti að halda um næstu helgi.

Guðjón sagði í þættinum að hann héldi enn í vonina um að þjóðhátið yrði haldin síðar í einhverri mynd.

,,Vonandi verður haldin einhver þjóðhátið. Mér finnst landinn eiga það skilið. Ég ætla nú ekki að fara að henda einhverri bombu í loftið um mínar skoðanir varðandi allt þetta. Vonandi næst núna á næstu tveimur vikum að hefta þessa útbreiðslu og við getum farið að keyra hlutina í gang og haft gaman aftur.“

Í lok viðtalsins bauð Guðjón svo upp á stutt skilaboð til stjórvalda.

,,Þetta kemur á endanum en skilaboð til stjórnvalda, þetta er að fara að verða komið gott.“