Lulu Lakatos þóttist vera sérfræðingur varðandi demanta og þóttist rannsaka og verðmeta sjö demanta í sýningarsal Boodles í New Bond Street í Mayfair í Lundúnum í mars 2016. Á meðan hún þóttist vera að skoða demantana stakk hún þeim á sig og setti litla steina í þeirra stað, eiginlega bara möl eins og notuð er í garða og innkeyrslur.

Demantarnir, eða öllu heldur steinarnir, voru settir í lokaða buddu og átti að geyma þá í peningaskáp Boodles þar til greiðsla væri innt af hendi. En demantasérfræðingur fyrirtækisins fylltist grunsemdum og fór að skoða málið. Þegar buddan var opnuð voru bara sjö litlir steinar í henni.

Þetta kom fram fyrir dómi í Southwark í síðustu viku en réttarhöld standa nú yfir í málinu. The Guardian skýrir frá þessu.

Saksóknarinn sagði að um vel útfærðan þjófnað hafi verið að ræða. Lakatos, sem er sextug, fæddist í Rúmeníu en bjó í Frakklandi þegar hún stal demöntunum, neitaði að hafa tekið þátt í samsæri um að stela demöntunum. Hún var handtekin í Frakklandi í september á síðasta ári og framseld til Bretlands.

Demantarnir sjö voru að verðmæti 4,2 milljóna punda en það svarar til um 715 milljóna íslenskra króna.