Kórónuveirufaraldurinn er enn stjórnlaus í Brasilíu og margir sérfræðingar reikna með að ástandið muni versna enn frekar á næstunni þar sem vetur er nú að skella á á suðurhveli jarðar.

 Brasilíska heilbrigðisstofnunin Fiocruz reiknar með að staðan muni versna mikið í júlí. Stofnunin segir að staðan sé „krítísk“ og telur að aðeins hafi um 15% fullorðinna lokið bólusetningu gegn COVID-19. „Veturinn nálgast og núverandi staða faraldursins getur versnað með tilkomu fleiri alvarlegra smita og annarra öndunarfærasjúkdóma sem krefjast sjúkrahúsinnlagnar,“ segir í fréttatilkynningu frá Fiocruz. Stofnunin segir einnig að nú smitist fleira ungt fólk en áður og því fylgi fleiri innlagnir á sjúkrahús en áður og að andlátum meðal ungs fólks hafi fjölgað.

Faraldurinn í Brasilíu hefur færst í vöxt eftir að ný afbrigði veirunnar komu fram á sjónarsviðið. Þar á meðal er gammaafbrigðið sem uppgötvaðist fyrst í Manaus í Amazon.

Brasilíska stjórnarandstaðan sakar Jair Bolsonaro, forseta, um að hafa sleppt því að kaupa bóluefni af pólitískum ástæðum og fyrir að gera lítið úr alvarleika faraldursins.

BBC segir að þing landsins sé nú að rannsaka viðbrögð Bolsonaro við faraldrinum.