Bandaríska athafnakonan Michelle Roosevelt Edwards, sem áður hét Michelle Ballarin, er hvað þekktust hér á Íslandi sem konan sem ætlaði að bjarga WOW Air. Nú hefur hún flækst inn í mál er varðar samsæriskenningar um kosningasvindl í forsetakosningum Bandaríkjanna sem fram fóru á síðasta ári.
Frá þessu greinir The Washington Post, en þar er einnig fjallað um viðtal Kveiks við Edwards, sem var sýnt í febrúar á þessu ári. Þannig er nefnilega mál með vexti að viðtalið var tekið í risastóru höfðingjasetri í Virginíufylki Bandaríkjanna, sem hún sagði sitt eigið. Nú hefur komið í ljós að það er ekki satt, en raunverulegur eigandi hússins skilur ekki hvernig á málinu stendur.
Í heimsókn Kveiks fullyrti Edwards að um sína eign væri að ræða. Þegar hún var spurð hvers vegna húsið væri skráð til sölu, svaraði hún með því að segjast hafa nýlega keypt eignina, og að það væri ekki til sölu. Um er að ræða 22 herbergja höfðingjasetur sem er skráð til sölu á 30 miljónir Bandaríkjadali.
Eignin er í eigu fyrirtækis sem stofnað var af David B. Ford, sem lést fyrir skömmu síðan. Ekkja hans sagðist ekki kannast við Edwards. Í kjölfarið var henni sýnt myndefni úr viðtali Kveiks og svaraði: „Hún er í húsinu mínu […] hvernig er hún í húsinu mínu?“
Edwards vildi ekki tjá sig við Washington Post um málið.
Samsæriskenningin sem Edwards er sögð tengjast kallast Italygate og snýst um að ítalskt hertæknifyrirtæki og meðlimir innan CIA hafi notað gervihnetti til að breyta atkvæðum til Trump í atkvæði sem fóru til Biden. Vert er að taka fram að engin haldbær gögn benda til þess að sannleik megi finna í kenningunni.
