Juventus er að undirbúa tilboð upp á 25 milljónir punda í Manuel Locatelli, miðjumann Sassuolo. Þá eru þeir einnig reiðubúnir til þess að senda varnarmanninn Radu Dragusin með kaupverðinu. Þetta kemur fram á vef Goal. 

Locatelli hefur verið hjá Sassuolo frá árinu 2019. Hann kom fyrst á láni frá AC Milan en var svo keyptur til félagsins. Þessi 23 ára gamli leikmaður hefur komið að 18 mörkum í 99 leikjum hjá Sassuolo.

Þá hefur Locatelli verið frábær á EM 2020 það sem af er. Hann skoraði til að mynda tvö mörk gegn Sviss fyrr í vikunni.

Dragusin er 19 ára gamall miðvörður sem hefur verið á mála hjá Juventus síðan 2018. Hann hefur þó aðeins leikið einn leik fyrir aðallið félagsins. Juve er tilbúið í að láta hann fara ef það hjálpar þeim við það að krækja í Locatelli.