Glúmur Baldvinsson, frambjóðandi Frjálslynda lýðræðisflokksins, var einn þeirra sem fylgdust með leik Þjóðverja og Frakka í gær. Gummi Ben var að lýsa leiknum og var Glúmur ekki sáttur með framburð hans á nöfnum Þjóverja.

„Eins og ég fíla Gumma Ben þá verður einhver að segja honum að hætta að bera fram þýsk nöfn á frönsku,“ skrifar Glúmur en Gummi á það til að sleppa því að bera fram seinasta staf þýskra nafna, líkt og gert er í frönsku.

Þannig verða nöfn eins og Neuer að Neue í framburði Gumma. Vert er að taka fram að blaðamaður horfði á umræddan leik og tók eftir að Gummi bar nöfnin einungis nokkrum sinnum svona fram, annars gerði hann það eðlilega.

„Er ekki einhver tungumálasérfræðingur sem getur upplýst Gumme um muninn á frönsku og þýsku plís. Myndi hann segja Hitle í stað Hitler?“ skrifar Glúmur eða Glúme eins og hann kallar sig í færslunni.