Pistll:

Arnar Þór Viðarsson landsliðsþjálfari karlalandsliðsins í knattspyrnu getur gengið stoltur frá borði eftir annað verkefni sitt með liðinu. Örlítill ólgusjór hefur verið í kringum landsliðið eftir að Arnar Þór tók við. Hans fyrsta verkefni með liðið var í mars, þar komu upp mál sem voru erfið fyrir þjálfarateymi liðsins að eiga við. Ekki þarf að rekja þau í þessari grein.

Þegar landsliðið kom svo saman nú í júní virtist stefna í stórslys, skömmu áður en Arnar hafði ætlað að velja hóp sinn fóru menn að hellast úr lestinni. Lykilmenn gáfu ekki kost á sér og aðrir fengu hreinlega ekki leyfi til að mæta í verkefnið, Arnar þurfti að fresta því að opinbera hóp sinn því fáir vildu eða gátu mætt. Ekki beint góð staða fyrir landsliðsþjálfara sem er nýr í starfi.

Arnar lagði af stað til Dallas í Texas til að mæta sterku liði Mexíkó, margir óttuðust hreinlega að íslenska liðið fengi skell í þeim leik. Frammistaðan var hins vegar góð þrátt fyrir 2-1 tap, ungir menn stimpluðu sig inn og þjóðin varð spennt. Næsti leikur liðsins var svo gegn Færeyjum, frammistaðan léleg en sigur kom í hús.

Liðið mætti svo öflugu liði Póllands í gær þar sem liðið gerði 2-2 jafntefli, frammistaðan var frábær og liðið hársbreidd frá sigri.

Eftir leikinn og þetta verkefni hefur Arnar fleiri svör en spurningar, ungir menn stigu hressilega upp og aðrir eldri menn minntu svo sannarlega á sig. Brynjar Ingi Bjarnason varnarmaður KA lék alla þrjá leikina, átti tvo frábæra leiki og virðist á leið í atvinnumennsku. Brynjar var að spila sína fyrstu landsleiki fyrir Ísland, það er efni í rannsókn hvernig hann hefur ekki spilað fyrir yngri landslið Íslands.

Ísak Bergmann Jóhannesson heillaði með frammistöðu sinni í Mexíkó. Fá margir vatn í munninn við þá tilhugsun að sjá Ísak og Gylfa Þór Sigurðsson saman á miðsvæðinu í haust. Andri Fannar Baldursson átti öfluga innkomu og stimplaði sig inn, sömu sögu er hægt að segja um Mikael Neville Anderson. Kolbeinn Sigþórsson virkaði í sínu besta formi í fimm ár, það er eitthvað til að byggja á.

Þá fékk Guðmundur Þórarinsson stórt tækifæri í stöðu vinstri bakvarðar í gær og greip gæsina, Guðmundur lagði upp eitt mark í leiknum og átti stóran þátt í öðru. Ögmundur Kristinsson gerði vel í markinu og áfram mætti telja. Albert Guðmundsson skoraði sitt fyrsta mark í alvöru landsleik, hann hafði áður aðeins skorað gegn liði Indónesíu sem almenningur þar í landi fékk að velja.

Arnar Þór stendur uppi sem sigurvegari eftir verkefnið, hann fékk erfið spil á hendi en getur labbað frá borði með sterkari og breiðari hóp. Þannig gæti íslenska þjóðin séð talsvert breytt og spennandi byrjunarlið í haust þegar undankeppni HM heldur áfram.

Það er svo Arnars að nýta þennan meðbyr í haustið þar sem úrslit þurfa að nást ætli Ísland að eiga möguleika á sæti á HM í Katar árið 2022.

Pistill eftir Hörð Snævar Jónsson