80 prósent þeirra sem greiddu atkvæði hjá Eflingu kusu Sólveigu Önnu Jónsdóttur – og stéttabaráttu. Í raun eru þetta stórtíðindi innan verkalýðshreyfingarinnar. Sólveig dregur ekki dul á að hún er sósíalisti og hún hefur meðal annars starfað með alþjóðlegum samtökum sem nefnast Attac sem berjast gegn kapítalisma og hnattvæðingu.

Efling er eitt stærsta verkalýðsfélag landsins. Fyrir er Ragnar Þór Ingólfsson í stærsta verkalýðsfélaginu, VR. Hann telst varla vera sósíalisti eins og Sólveig Anna – starfaði um tíma innan Dögunar – en þau ná saman í gagnrýni á hina hefðbundnu verkalýðshreyfingu og vilja til að fara í harðari aðgerðir.

Með þau tvö í forystu fyrir þessum stóru verkalýðsfélögum erum við að horfa fram á harðari verkalýðsbaráttu – sem ríkisstjórn sósíalistans Katrínar Jakobsdóttur þarf að takast á við. Og nú fer verulega að hitna undir Gylfa Arnbjörnssyni og ríkjandi öflum í Alþýðusambandinu.