Landlæknir hefur nú undir höndum ábendingar frá Geðhjálp þess efnis að alvarlegt ofbeldi viðgangist gegn sjúklingum á öryggis- og réttargeðdeildum Landspítalans.

RÚV greindi frá í kvöldfréttum.

Þessar geðgeildir eru staðsettar í húsi Kleppspítalans við Sund. Sjúklingar þar eru ekki frjálsir ferða sinna.

Í greinargerð Geðhjálpar vitna starfsmenn um að sjúklingar séu beittir lyfjaþvingunum, þeir verði fyrir ofbeldi og brotið sé á rétti þeirra. Einnig tíðkist ógnarstjórnun á geðdeildunum og starfsmenn verði fyrir andlegu ofbeldi.

Grímur Atlason, framkvæmdastjóri Geðhjálpar, lýsti því í viðtali við Kastljós að fyrrverandi og núverandi starfsmenn deildanna hefðu leitað til Geðhjálpar með áhyggjur sínar og Geðhjálp hefði tekið punkta þeirra saman í greinargerð og sent á Landlækni.

Í máli Gríms kom meðal annars fram að ýmsar refsingar gegn sjúklingum tíðkuðust, til dæmis að svipta þá kaffidrykkju og reykingum og meina þeim um útivist. Þá séu dæmi um að fólk sé lokað inni á herbergjum sínum svo vikum og jafnvel mánuðum skipti.

Aðspurður tók Grímur undir að þetta væru refsingar til að ná stjórn á veiku fólki. „Að okkar mati er þetta steinaldarfræði sem á ekki að sjást,“ sagði Grímur.