Klaudia Katarzyna var ein þeirra fjölmargra sem fóru að eldgosinu í Geldingadölum á laugardagskvöld. Hún gekk að gosinu með kærasta sínum og vinkonu en bakaleiðin gekk ekki áfallalaus fyrir sig.

Á leiðinni til baka rann Klaudia og fótbrotnaði og gat þar af leiðandi ekki haldið göngunni áfram. Það var hugulsömum göngumönnum að þakka að Klaudia komst heil á húfi til baka.

„Við vorum þarna í einhverja 2 tíma, ég tók myndir og við vorum bara að horfa og njóta. Svo datt ég á leiðinni niður. Ég datt svolítið illa og ég er þríbrotin á fætinum,“ segir Klaudia í samtali við blaðamann DV.

Þetta er ekki í fyrsta skiptið sem Klaudia fótbrotnar svo kærastinn hennar og vinkona héldu í fyrstu að hún væri að grínast.

„Það var svo frábært veður þegar við vorum að ganga upp en svo allt í einu, þegar við byrjuðum að ganga niður, varð ískalt og mikill vindur,“ segir Klaudia en fólk sem einnig var að labba frá eldgosinu hjálpaði henni.

„Fólkið sem var að ganga framhjá, það kom bara hópur af Íslendingum sem klæddi sig úr. Ég fékk úlpur, teppi, vindbuxur, bara allt. Þau voru að búa til svona skjól úr bakpokum og öllu sem þau höfðu,“ segir Klaudia.

Klaudia þakkar íslenskri stelpu sérstaklega fyrir en hún aðstoðaði hana með öndun og fleira á meðan beðið var eftir björgunarsveitarfólki.

„Það var ein stelpa sem hélt í höndina á mér. Hún var held ég hjúkrunarfræðingur en ég man ekki hvað hún heitir. Hún var að passa mig því ég var alveg að detta út, þetta var svo svakalega vont. Ég þekki hana ekki neitt, hún kom bara. Hún var að horfa í augun á mér, strjúka á mér hárið. Þetta var alveg, bara magnað.“

Klaudia vonar að stelpan sem hjálpaði henni sé að lesa fréttina og sendir henni eftirfarandi skilaboð: „Ég vil bara þakka henni kærlega fyrir þetta. Kærastinn minn var bara í sjokki þannig hann gat ekki sagt mikið þannig hún steig bara inn. Hún vissi alveg hvað hún var að gera, hún var alveg með þetta og er gull af manni.“

Þrátt fyrir þetta allt saman er Klaudia ánægð með að hafa náð að sjá eldgosið. Hún stefnir á að ganga aftur að því þegar tækifæri gefst til.