1,6 milljónir íbúa í Kaliforníu, fjölmennasta ríki Bandaríkjanna, hafa skrifað undir kröfu um að kosið verði um framtíð Gavin Newsom, ríkisstjóra, í embætti. Innanríkisráðuneyti ríkisins skýrði frá þessu í byrjun vikunnar.

Það eru Repúblikanar, sem vilja losna við Newsom úr embætti, sem eru í fararbroddi fyrir undirskriftasöfnunina. Þeir sem hafa skrifað undir kröfuna hafa nú 30 daga til að afturkalla undirskrift sína en ólíklegt má telja að það gerist í einhverjum mæli. Það stefnir því í að íbúar ríkisins gangi að kjörborðinu í haust og kjósi um framtíð Newsom.

Þeir munu þá kjósa um hvort víkja eigi honum úr embætti og hver eigi þá að taka við af honum. Ekki verður tekin afstaða til síðari spurningarinnar nema helmingur kjósenda greiði fyrri spurningunni atkvæði sitt.

Newsom var áður borgarstjóri í San Francisco en hann var kjörinn ríkisstjóri 2018 með 62% atkvæða. Hann hyggst bjóða sig fram á nýjan leik á næsta ári.

Hugmyndin um að víkja honum úr embætti kom fram í febrúar á síðasta ári en það er hópurinn California Patriot Coalition sem er í fararbroddi í baráttunni en hópurinn er á móti frjálslyndri stefnu Newsom. Hópurinn hefur fengið aukinn stuðning í heimsfaraldrinum vegna óánægju margra með gang bólusetninga í ríkinu, lokun skóla og aðrar sóttvarnaaðgerðir.