Aðalfundi Ríkisútvarpsins lauk rétt í þessu en þar kom fram að rekstur RÚV var neikvæður í fyrsta sinn frá árinu 2014. Í fréttatilkynningu sem RÚV sendir frá sér eru tíundaðar ástæður tapsins og er þá helst bent á heimsfaraldurinn og áhrif hans á auglýsingasölu. Auglýsingatekjur lækka um tæplega 200 m.kr. milli ára.

„Samkvæmt rekstrarreikningi og yfirliti um heildarafkomu var tap á rekstri RÚV að fjárhæð 209 milljónir króna eftir skatta á árinu 2020. Í árslok námu heildareignir 8.340 milljónum króna, eigið fé var 1.923 milljónir króna og eiginfjárhlutfall var 23,1% í árslok 2020. Auglýsingamarkaður hefur dregist saman á undanförnum árum og var samdrátturinn mun meiri á árinu 2020 í samanburði við þróun fyrri ára og má rekja það til áhrifa COVID-19. Dreifing tekna hefur einnig breyst töluvert og sífellt stærri hluti auglýsingatekna rennur til erlendra aðila með sölu auglýsinga á netinu og samfélagsmiðlum samkvæmt greiningum Hagstofunnar. Óvissa ríkir um þróun á næstu árum. Ljóst er að frekari þrengingar á auglýsingamarkaði munu hafa áhrif á tekjur félagsins og möguleika þess til að sinna þjónustuhlutverki sínu.“

Einnig kemur fram að þrátt fyrir taprekstur hafi verið mikil aukning í nýtingu á þjónustu RÚV.  Daglega noti 70% landsmanna miðla RÚV og 92% í hverri viku samkvæmt mælingu Gallups.

Lagt hafur verið upp með  stefnu- og áherslubreytingar í þróun á dagskrárefnis og aukin áhersla sé sífellt á innlent og norrænt efni á kostnað þess bandaríska. „Á síðustu fimm árum hefur framboð á íslensku efni aukist um 66% og norrænu efni um 112% en bandarískt efni hefur dregist saman um 42%. Með áherslubreytingum á undanförnum misserum hefur þjónusta við börn og ungt fólk stóraukist, m.a. með öflugri starfsemi KrakkaRÚV, UngRÚV og MenntaRÚV. Þá hefur áhersla á menningu og listir verið aukin, sem og áhersla á stafræna miðlun, samstarf og þróun,“ segir í tilkynningunni.

Hér má sjá ársskýrsluna í heild sinni.