Halldór Kristmannsson, fyrrverandi samstarfsmaður Róberts Wessman, forstjóra Alvogen, sem í síðustu viku steig fram með alvarlegar ásakanir um hegðun forstjórans, vill ná fram sáttum í málinu. Þetta kemur fram í tilkynningu frá Halldóri.

Í tilkynningunni segist hann vilja ljúka málinu með sátt og utan dómstóla til þess að hægt sé að horfa fram á veginn.

„Ég hef talsverðar áhyggjur af því að aðgerðarleysi Alvogen og Alvotech gagnvart Róbert Wessman, kunni að skaða orðspor fyrirtækjanna. Málið hefur vakið nokkra athygli erlendis á meðal samstarfsaðila, viðskiptavina og fjárfesta, sem hafa sumir hverjir sett sig í samband við mig. Umræddir aðilar hafa eðlilega borið upp spurningar og lýst áhyggjum af þróun mála. Sama á við um íslenska fjárfesta, sem komu nýlega að fjármögnun Alvotech, og aðra sem hafa hagsmuna að gæta hér á landi.

Ég vill því stíga fram og ítreka sáttahug og velvilja í garð fyrirtækjanna og samstarfsmanna. Slík sátt setur hagsmuni fyrirtækjanna í forgang og felur í sér að óháðir stjórnarmenn taki hæfi Róberts til alvarlegrar skoðunar. Auðmýkt, virðing og almenn skynsemi, er það eina sem þarf til að ljúka þessu máli, með farsælum hætti,“ segir hann í yfirlýsingunni.

Eftir að ásakanir Halldórs komu fyrst upp fól stjórn Alvogen breskri lögmannsstofu að rannsaka trúverðugleika hennar. Halldór segir þá rannsókn hafa verið hvítþvott.

Fordæmalaus harka í minn garð, sem uppljóstrara, er beinlínis með ólíkindum. Sama dag og nafni mínu er lekið í fjölmiðla og tilkynnt um „hvítþottinn“, þá er setið fyrir mér fyrir utan World Class í Smáralind, með uppsagnarbréf og stefnu, þar sem fyrirtækin hyggjast freista þess að fá lögmæti uppsagnarinnar staðfesta fyrir Héraðsdómi. Stjórnum fyrirtækjanna virðist einfaldlega vera ofviða að framkvæma óháða rannsókn á stjórnarformanni, forstjóra og sínum stærsta hluthafa, eða aðhafast nokkuð yfir höfuð þegar Róbert er annars vegar.“

Halldór segir þá að lokum í yfirlýsingu sinni: „Þá vakti það athygli mína að talsmaður Róberts, kýs að halda því sérstaklega til haga í fjölmiðlum, að forstjórinn hafi verið í flugvél þegar morðhótanir áttu sér stað, og hafi reyndar engum hótað frá árinu 2016.“