Karlmaður á þrítugsaldri var í dag í Héraðsdómi Reykjaness úrskurðaður í fimm daga gæsluvarðhald, eða til föstudagsins 9. apríl, vegna andláts þrítugs manns á Landspítalanum á laugardag. Þetta kemur fram í tilkynningu lögreglu.

DV greindi í gær frá andláti mannsins, sem átti sér stað í kjölfar líkamsárásar í Kórahverfinu í Kópavogi. Málið er rannsakað sem manndráp.

Sjá einnig: Íslendingur látinn eftir hrottalega árás fyrir utan heimili sitt í Kópavogi

Gæsluvarðhaldið er á grundvelli rannsóknarhagsmuna að kröfu Lögreglunnar á höfuðborgarsvæðinu í þágu rannsóknar hennar á andlátinu.

Þrír voru handteknir vegna málsins í gær, en tveimur hefur nú verið sleppt úr haldi og sá þriðji úrskurðaður í gæsluvarðhald eins og að framan greinir.

Í tilkynningu lögreglu segir að ekki sé hægt að veita frekari upplýsingar um málið að svo stöddu.