Gærdagurinn var afar afdrifaríkur fyrir Eurovision-heiminn. Fyrir gærdaginn sat Daði Freyr á toppi allra veðbanka með lag sem eftir átti að koma út en í dag sitjum við í þriðja sæti samkvæmt vefsíðunni eurovisionworld.com með 8% sigurlíkur, það sama og Ítalir og Frakkar.

Lögin tvö sem eru fyrir ofan Ísland eru annars vegar lagið „Growing Up is Getting Old“ með söngkonunni VICTORIA en hún kemur til með að keppa fyrir hönd Búlgaríu í keppninni. Lagið kom út seint í gærkvöldi en VICTORIA hefði átt að keppa í lokakeppninni í fyrra sem var frestað vegna kórónuveirufaraldursins. Hún fékk þó sama díl og Daði Freyr og samdi einfaldlega nýtt lag fyrir keppnina. Henni eru gefnar 9% sigurlíkur.

Lagið sem prýðir efsta sætið í dag er framlag Sviss sem einnig var kynnt í gær. Lagið heitir „Tout l’Univers“ sem myndi þýðast yfir á íslensku sem „Allur alheimurinn“ en lagið er sungið af svissneska-albanska söngvaranum Gjon’s Tears. Hann syngur lagið á frönsku sem er eitt af opinberu tungumálum Sviss. Laginu eru gefnar 12% sigurlíkur og er efst í öllum veðbönkum heims nema hjá SkyBet sem telja Búlgaríu eiga meiri líkur á sigri.

Laginu hans Daða Freys var lekið á netið í gær en það á ekki að koma út formlega fyrr en á laugardaginn. Skarphéðinn Guðmundsson, dagskrárstjóri RÚV, sagði í dag að hann telji að lekinn gæti haft eitthvað með veðbanka að gera.