Á tíunda tímanum í gærkvöldi missti ökumaður stjórn á bifreið sinni og ók út af Þingvallavegi. Hafnaði bifreiðin á hvolfi í skurði. Ökumaðurinn var fluttur með sjúkrabifreið á bráðadeild til aðhlynningar. Að henni lokinni var hann handtekinn grunaður um ölvun við akstur og fluttur í fangageymslu lögreglunnar.

Á ellefta tímanum var ökumaður handtekinn í miðborginni eftir að hann hafði ekið á kantstein og skemmt bifreið sína. Hann er grunaður um að hafa verið undir áhrifum fíkniefna, að fara ekki að fyrirmælum lögreglu og vörslu/sölu fíkniefna og lyfja. Hann var vistaður í fangageymslu.

Á tólfta tímanum hafði lögreglan afskipti af manni sem er grunaður um þjófnað úr verslun í Bústaðahverfi.

Skömmu fyrir miðnætti datt ung kona af rafskútu og meiddist í andliti. Hún var flutt á bráðadeild með sjúkrabifreið.

Skráningarnúmer voru fjarlægð af 14 bifreiðum í Kópavogi og Breiðholti í nótt því þær höfðu ekki verið færðar til skoðunar á tilsettum tíma og/eða voru ótryggðar.

Einn ökumaður var handtekinn síðdegis í gær í austurborginni en hann er grunaður um að hafa verið undir áhrifum fíkniefna og akstur sviptur ökuréttindum.