Vítissódi er notaður til að stýra sýrustigi í vatnsbirgðum en efnið er einnig notað við til dæmis sápugerð og framleiðslu stíflueyðis. Óþekktir tölvuþrjótar reyndu á föstudaginn að eitra fyrir íbúum bæjarins Oldsmar í Flórída í Bandaríkjunum með því að breyta magni þeirra efna sem eru sett í drykkjarvatnið, þar á meðal var vítissódi.

Sky News skýrir frá þessu og hefur eftir Bob Gualtieri, lögreglustjóra, að þrjótunum hafi tekist að komast inn í tölvukerfi vatnsveitunnar. Þeir hafi um stundarsakir aukið magn vítissóda úr 100 hlutum á milljón í 11.100 hluta á milljón. Vítissódi getur í miklu magni valdið ertingu á húð, bruna og fleiri vandamálum. Það vildi til á föstudaginn að starfsmaður vatnsveitunnar sá hvað var að gerast og gat breytt magninu aftur í rétt horf.

Embættismenn segja að bæjarbúar, sem eru um 15.000, hafi aldrei verið í neinni hættu. Þeir segja einnig að fleiri öryggisþættir hafi valdið því að hið aukna magn vítissóda hefði ekki getað komist út í vatnið.

Nú er búið að loka fyrir aðgang utan frá að stjórnkerfi vatnsveitunnar.

Staðarlögreglan, FBI og leyniþjónustan (Secret Service) rannsaka nú málið en vita ekki hvaðan árásin var gerð.