Þorsteinn, forsprakki #Karlmennsku-byltingarinnar, er grænkeri og borðar því engar dýraafurðir. Hann deildi nýlega með okkur hvað hann borðar á venjulegum degi. Hér deilir hann með okkur uppskrift að baunamasala og naan brauði sem nýtur mikilla vinsælda hjá fjölskyldu hans.

Sjá einnig: Engin lífskerðing að vera vegan – Þetta borðar Þorsteinn á venjulegum degi

Baunamasala með naanbrauði

„Nú munu kokkar og matreiðslufólk sennilega fordæma mig, því þessi uppskrift er einhver blanda af chana masala og veg masala sem ég fann á Google, en hefur verið þrautreynd í eftirfarandi form og nýtur mikilla vinsælda í okkar fjölskyldu,“ segir Þorsteinn.

Hráefni

• 1 stk. laukur
• 1 msk. kúmín
• Smá salt
• 2-3 hvítlauksgeirar
• Lítill bútur af fersku engiferi
• ½ askja ferskt kóríander (ca. 1 bolli)
• ½ – 1 ferskt chilli
• 1 tsk. túmerikduft
• 1 msk. garam masala-krydd
• 2 dósir kjúklingabaunir
• 1 dl tómatpaste (ég set bara slummu)
• 1 dós hakkaðir tómatar (mínus safinn)
• 1-2 dl vegan-jógúrt
• 2 msk. sítrónusafi
• 1-2 tsk. kókossykur (eða bara smá sykur)

Aðferð:

1. Saxa lauk og steikja á pönnu og krydda með kúmín og smá salti.
2. Mauka hvítlauk, engifer, chilli og kóríander og henda út á pönnuna.
3. Setja baunirnar á pönnuna og svo allt hitt. Markmiðið er að hafa réttinn þykkan, en ekki þunnan.

Naanbrauð

• 1 tsk. þurrger
• 1,3 dl hitað vatn (ca. 37 gráður)
• 1 tsk. sykur
• 190 g hveiti
• ½ tsk. salt

Aðferð:

1. Blanda þurrgeri, sykri og vatni og leyfa að standa í nokkrar mínútur.
2. Blanda því síðan við hveitið og saltið.
3. Hnoða og skipta upp í nokkrar kúlur.
4. Fletja út og steikja með vegansmjöri (Smorbar frá Naturli best).
5. Krydda með hvítlaukssalti, basilíku og kóríanderkryddi.