Dómur er fallinn í máli lögreglustjórans á Norðurlandi eystra gegn manni sem upphaflega var ákærður fyrir að kýla mann á Akureyri í tvígang með krepptum hnefa í andlitið. Árásin átti sér stað í byrjun apríl á síðasta ári.
Í dómnum segir að ákærunni hafi við meðferð málsins verið breytt á þann veg að „tvö hnefahögg“ urðu að „einum kinnhest.“ Athæfið þótti varða við 217. gr. almennra hegningarlaga hvort sem um er að ræða kinnhest eða hnefahögg.
Maðurinn játaði sök miðað við breytt orðalag ákærunnar. Segir í dómnum: „Með játningu [ákærða], sem ekki er ástæða til að efa að sé sannleikanum samkvæm, og gögnum málsins, er nægilega sannað að hann hafi gerst sekur um þá háttsemi sem í ákæru er lýst og þar er réttilega heimfærð til refsiákvæða.
Engan sakarkostnað leiddi af málinu og mun brotaþoli ekki hafa haft uppi einkaréttarlega kröfu í málinu.
Var maðurinn því dæmdur í 30 daga fangelsi, skilorðsbundið til tveggja ára.