Á tólfta tímanum í gærkvöldi var tilkynnt um eld í bíl á Vífilstaðavegi í Garðabæ. Slökkvilið slökkti eldinn. Á tíunda tímanum sá eigandi tóbaksverslunar í miðborginni tvo unga menn hlaupa frá versluninni eftir að rúða var brotin í henni. Skömmu fyrir klukkan 23 var tilkynnt að rúða hefði verið brotin í skartgripaverslun í miðborginni.

Á níunda tímanum í gærkvöldi var tilkynnt um konu í annarlegu ástandi í Bústaðahverfi. Hún gat hvorki sagt til nafns né framvísað skilríkjum. Hún var handtekin og vistuð í fangageymslu enda í slæmu ástandi. Skömmu síðar var tilkynnt um mann að stela vínflösku frá veitingastað í miðborginni. Hann var handtekinn skömmu síðar og vistaður í fangageymslu. Hann er grunaður um gripdeild og brot á vopnalögum.

Einn ökumaður var handtekinn í nótt, grunaður um að vera undir áhrifum fíkniefna og að fara ekki að fyrirmælum lögreglu.