Kona á besta aldri, Eygló Svava Kristjánsdóttir, 42 ára, leitaði á bráðadeild Landspítalans seint í mars með skerta meðvitund og slappleika. Einum og hálfum klukkutíma síðar tók vakthafandi læknir ákvörðun um að senda hana heim. Morguninn eftir kom faðir hennar að henni látinni í rúmi hennar.

Fjallað er um mál Eyglóar í kvöldfréttum og Kastljósi á RÚV í kvöld. 

Í niðurstöðu úttektar landlæknis á máli Eyglóar kemur fram að ekki voru gerðar neinar grundvallarrannsóknir á henni, ekki var tekin blóð- eða þvagprufa, ekki gerð lífsmarkamæling og sjúkrasaga hennar var ekki könnuð. Eygló átti alvarlega sögu blóðsýkinga og hafði tvisvar verið lögð inn á sjúkrahús vegna veikinda sinna.

Faðir Eyglóar, Kristján Ingólfsson, gagnrýnir viðbrögð Landspítalans í viðtali við RÚV. Hann segir að spítalinn reyni að skýla sér á baki við álag vegna Covid-19 en ekkert álag hafi verið á deildinni þetta kvöld. Kristján segir:

„Við vitum að það var ekkert álag. Heimsfaraldur hafði engin áhrif þarna þetta kvöld á veru dóttur minnar. Við viljum að það komi skýrt fram. Þetta er jú dóttir mín. Sem mér þótti mjög vænt um. Og ég vil ekki að aðilar komist upp með að vera valdir að andláti hennar. Eins og segir hjá landlækni. Ef það hefði verið verklag eins og á að vera í þessu tilfelli hefði mögulega verið hægt að komast hjá andláti Eyglóar Svövu. Þetta er mat landlæknis. Og það er ekki hægt annað en að einhver beri ábyrgð á því.“