Í kjölfar frétta af stökkbreyttu afbrigði kórónuveirunnar, sem veldur COVID-19, á Bretlandseyjum hafa mörg Evrópuríki gripið til þess ráðs að loka fyrir flugferðir frá Bretlandi. Ástæðan er að nýja afbrigðið er sagt allt að 70% meira smitandi en þau sem fyrir eru en ekkert hefur komið fram sem bendir til að það geri fólk meira veikt eða sé banvænna.

Nú hafa Danmörk, Holland, Írland, Belgía, Frakkland, Þýskaland og Ítalía tilkynnt að lokað hafi verið fyrir alla flugumferð frá Bretlandi. Dönsk stjórnvöld voru síðust til að bætast í þennan hóp en Magnus Heunicke, heilbrigðisráðherra, tilkynnti þetta á Twitter í nótt. Bann Dana gildir í 48 klukkustundir til að byrja með á meðan farið er yfir stöðuna.

Það er mat danskra stjórnvalda að stökkbreytta afbrigðið, sem hefur breiðst út í Lundúnum og víðar á Englandi, geti gert yfirvöldum erfiðara fyrir við að hafa stjórn á faraldrinum og af þeim sökum verði að banna allt flug frá Bretlandi næstu 48 klukkustundir. Bannið tekur gildi klukkan 10 í dag að dönskum tíma.

Fleiri Evrópuþjóðir íhuga nú að banna allt flug frá Bretlandi, þar á meðal Noregur og Svíþjóð. Frakkar og Belgar hafa einnig bannað allar siglingar frá Bretlandi og Frakkar hafa lokað Ermarsundsgöngunum.