Þórólfur Guðnason sóttvarnalæknir segist vonast til að faraldurinn fari niður á við á næstunni en vísbendingar eru um að svo gæti orðið. Þetta kom fram á upplýsingafundi dagsins. Fjórtán innanlandssmit voru greind í gær en þar af var aðeins einn utan sóttkvíar. Um 1.300 sýni voru tekin. Hlutfall sýktra af þeim var 0,6% og fer lækkandi. Allir sem greindust í gær voru með lögheimili á höfuðborgarsvæðinu.
Þórólfur segir að smitin undanfarið hafi borið uppi litlar hópsýkingar, í leikskóla, bænahópi og fjölskyldu- og vinahópum.
„Faraldurinn undanfarið hefur verið í línulegum vexti en spurningin er núna hvað hann er að gera. Hvort hann er að fara niður á við eða við höldum sama hraða og áður, næstu dagar munu skera úr um það.“
Þórólfur tjáði sig um aðstæður íþróttamanna sem hafa lýst yfir mikilli óánægju með æfinga- og keppnisbann í fullorðinsflokkum. Þórólfur benti á að aðgerðirnar hefðu verið íþyngjandi fyrir nær alla íbúa landsins og tiltók meðal annars veitingastaði og krár, líkamsræktarstöðvar og marga fleiri. Hann sagðist skilja óþreyju íþróttamanna og vonast til að hægt verða að hefja æfingar og keppni í náinni framtíð.
Þórólfur segir ótímabært að gera ráð fyrir að bólusetning geti hafist strax eftir áramótin. Vill hann hvetja til raunhæfrar bjartsýni hvað varðar tímasetningu bólusetningar hér á landi. Mikilvægt sé að fólk slaki ekki á einstaklingsbundnum sóttvarnaaðgerðum vegna bjartsýnisfrétta af bóluefnum.