Svandís Svavarsdóttir, heilbrigðisráðherra, fylgist með málefnum hópsýkingarinnar á Landakoti þó svo að málið sé ekki opinberlega inn á hennar borði. Stundin greindi því í morgun að Svandís hafi neitað að veita viðtöl eða tjá sig um hópsmitið og sagði aðstoðarmaður hennar, Birgir Jakobsson, að málið væri ekki inn á borði hjá henni.

Í samtali við DV segir Birgir þetta rétt eftir sér haft, hins vegar þýði það ekki að Svandís sé ekki að fylgjast með þróun mála. Hins vegar hafi slík mál lögboðna leið í gegnum kerfið. Fyrst þurfi Landlæknir að rannsaka málið og skila sínum niðurstöðum. Það hafi ekki verið gert og þær niðurstöður sem kynntar verða í dag eru niðurstöður úttektar Landspítala en enn eigi eftir að rannsaka málið hjá embætti Landlæknis en eftir því hverjar niðurstöður þeirrar rannsóknar verða gæti vel verið að málið endi inn á borði hjá Svandísi.

Í millitíðinni sé ekki rétt að hún sé að tjá sig um málið.

„Málið er þannig að það er tilkynnt til embættis landlæknis sem alvarlegt atvik og landlæknir er eftirlitsaðili að svona málum þannig það er ekki rétt að ráðherra sé að tjá sig um mál sem eru í rannsókn hjá eftirlitsaðilanum,“ sagði Birgir í samtali við blaðamann.

Sagði Birgir að blaðamaður Stundarinnar hafi fengið sömu svör, en hafi þó ákveðið að stilla svarinu upp með þeim hætti að ekki var tekið fram hvers vegna ráðherra gat ekki tjáð sig.

„Hann hefur eitthvað snúið þessu okkur í óhag. Ég er ekki alveg að átta mig á því.“