Kasper Cichocki er Pólverji sem býr á Akureyri og hefur búið á Íslandi í þrjú ár. Kasper telur sig illa svikinn af einum samlanda sínum sem hann leigði herbergi á Akureyri. Kasper hefur fjallað um málið í nokkrum Facebook-hópum og varað við leigjandanum. Frásögn hans er nokkurn veginn svona (breytt lítillega vegna persónuverndarsjónarmiða):
„Mig vantar aðstoð við að finna þennan einstakling, og á sama tíma vara við honum. Þann 7. október flutti hann inn í herbergi sem ég er að leigja út. Viku eftir að hann skrifaði undir leigusamninginn segir hann mér að hann hafi verið að greinast með krabbamein og hafi misst vinnuna, (sem var lygi) svo hann getur ekki borgað leiguna, þarna er hann ekki ennþá búinn að skila inn tryggingunni heldur, en lofar að borga í næstu viku. 4 nóvember sendi ég honum skilaboð til að minna hann á að borga, en aldrei barst greiðslan.Í dag bankaði ég upp á hjá honum til að reyna að fá leiguna borgaða, en fann herbergið tómt, búið að eyðileggja húsgögn og veggi. Ég hef upplýsingar frá nágrönnum hans að hann var í herberginu í gær. Nú er hann búinn að blocka mig á facebook og slökkt á símanum hans.Ef þið vitið eitthvað um þennan mann, hvar hann heldur til að hvar hann vinnur núna, endilega sendið mér skilaboð!“
Kasper segir í samtali við DV að hann hafi eytt miklum tíma í að rannsaka manninn og tilkynnt athæfi hans til lögreglunnar en lögreglan sýni málinu því miður lítinn áhuga. Segist hann hafa komist að því sjálfur að maðurinn sé fluttur til Reykjavíkur, hafa komist að því hvar hann heldur til og sent allar upplýsingar um málið til lögmanns síns.
„Hann yfirgaf herbergið í 200 þúsund króna skuld við mig fyrir utan skemmdirnar sem hann hefur hvorki greitt fyrir né látið mig vita af. Hann einfaldlega fór án þess að láta vita af sér eftir að ég gaf honum lokaviðvörun varðandi greiðslur. Hann laug að mér í þrjár vikur að hann væri veikur, að hann væri með krabbamein, en það eru hreinar lygar, ég hef fengið það staðfest í samtölum við fjöldann allan af fólki á Akureyri. Hann hefur stolið af mörgum öðrum og svikið fé út úr fólki. Hann er yfirleitt með svipaðar afsakanir og hann virðist hafa týnt sér í eigin lygavef.“
Kasper segist vera að bíða eftir því að lögreglan hafi samband við hann því skemmdir eftir manninn séu lögreglumál, auk þess sem hann ætli að höfða einkamál á hann.
Segir Kasper að maðurinn hafi svikið og blekkt um 15 manns á Akureyri undanfarna tvo mánuði.
„Lögreglan gerir ekkert í málinu en ég hef fengið upplýsingar um að hann sé að reyna að flýja til Póllands. Hann er með bókað flug til Varsjá þann 14. nóvember,“ segir Kasper og vonar að för mannsins verið stöðvuð.
„Mér finnst ennþá verra að hann skuli vera Pólverji því hann kemur óorði á samlanda mína,“ segir Kasper en umræddur maður segist hafa búið á Íslandi undanfarin 12 ár.
