Geir Gunnar Markússon starfar sem næringarfræðingur á Reykjalundi. Hann er ritstjóri heimasíðu Náttúrulækningafélags Íslands, nlfi.is, og skrifar mikið um hin ýmsu heilsutengdu málefni. Hann sinnir einnig næringar- og heilsuráðgjöf í formi fyrirlestra í fyrirtækjum, félagasamtökum og íþróttafélögum, en þó lítið undanfarna mánuði vegna COVID-19. Nýlega fengum við Geir Gunnar til að fara yfir venjulegan dag í lífi sínu.

Sjá einnig: Þetta borðar Geir Gunnar á venjulegum degi

Hér deilir hann með okkur uppskrift að matarmikilli gúllassúpu.

Gúllassúpa lögfræðingsins (konunnar)

Nú er haustið komið og við erum þó nokkuð með súpur og matarmikil gúllassúpa er eitthvað sem klikkar ekki núna þegar farið er að kólna í veðri. Ekki skemmir fyrir að dætur mínar elska þessa súpu.

Hráefni

500 g nautagúllas

2-3 rauðlaukar

2 msk. ólífuolía

2 nautateningar

1 grænmetisteningur

2 dósir hakkaðir tómatar

3 tsk. tómatkraftur/puré

2 lítrar vatn

1 -2 tsk. paprikuduft

6 hvítlauksrif

6-8 kartöflur, skornar

4 gulrætur, skornar

1 paprika

1 peli rjómi

Salt, pipar og timían

Fersk steinselja

Sýrður rjómi

Aðferð

1. Hitið olíu og snöggsteikið lauk og kjöt.
2. Bætið þá hvítlauk, papriku og tómatkrafti út í og eldið í 10 mín.
3. Bætið síðan vatni út í ásamt tómötum, krafti, paprikudufti, kartöflum og gulrótum og látið sjóða í a.m.k. 1 klst.
4. Hellið rjómanum saman við og kryddið með salti, pipar og timían. Látið sjóða í aðra klst. og lengur ef tími gefst.
5. Á þessum tveimur tímum sem súpan fær að malla er virkilega mikilvægt að smakka til og krydda og smakka svo meira. Jafnvel að bæta krafti út í ef með þarf.
6. Berið fram toppað með sýrðum rjóma og steinselju.

Hugmynd að framreiðslu: Borið fram með nýbökuðu brauði til að dýfa í súpuna. Rauðvín smakkast alveg sérlega vel með þessari súpu fyrir þá sem það þiggja.