Í viðtalinu opnaði Díana sig og sagði umbúðalaust frá hversu óhamingjusöm hún hefði verið. Tæplega 23 milljónir Breta horfðu á viðtalið sem var í Panorama á BBC1. Óhætt er að segja að viðtalið hafi hrist bresku konungsfjölskylduna.
Í því sagði Díana frá framhjáhaldi eiginmannsins, lystarstoli sínu og vandræðum hennar með að passa inn í konungsfjölskylduna.
Samkvæmt frétt The Sunday Times þá hafa nú komið fram ásakanir um að Bashir hafi beitt óvönduðum meðölum til að fá Díönu í viðtalið. Hann er sagður hafa á meðvitaðan hátt spilað á ótta hennar við að breska leyniþjónustan fylgdist með henni. Hann er einnig sagður hafa notað falsaðar upplýsingar um reikningsúttektir til að sannfæra bróðir Díönu, Charles Spencer, um að útvega sér viðtal við Díönu.
Þessar ásakanir passa ekki við niðurstöðu rannsóknar sem BBC gerði ári eftir viðtalið en þá verið uppi vangaveltur og áhyggjur um hvernig Bashir hefði tekist að vinna traust Díönu.
The Sunday Times segir að þremur mánuðum fyrir viðtalið hafi Bashir sagt Spencer að hann væri að rannsaka ásakanirnar um njósnir leyniþjónustunnar. Hann er einnig sagður hafa sýnt honum falsaðar reikningsúttektir til að sannfæra Spencer um að fyrrum öryggisstjóri hans hefði selt upplýsingar um fjölskylduna til fjölmiðla og leyniþjónustunnar MI5.
Spencer er sagður hafa varað Díönu við að Bashir myndi koma með ótrúlegar ásakanir en hún ákvað samt að mæta í viðtal hjá honum.
„Án Spencer, hefði Bashir aldrei náð til hennar,“
Hefur The Sunday Times eftir heimildarmanni.
