Gylfi Þór Sigurðsson hefur heillað breska blaðamenn og stuðningsmenn Everton á þessu tímabili, þrátt fyrir að vera í minna hlutverki er frammistaða Gylfa að falla vel í kramið.
Gylfi hefur ekki byrjað leik í ensku úrvalsdeildinni en fengið traustið í deildarbikarnum og var í byrjunarliðinu gegn West Ham í gær.
Líkur eru á að Gylfi verði í byrjunarliði Everton um helgina þar sem meiðsli komu upp í deildarbikarnum í gær. „Þetta var annað mjög gott kvöld fyrir Gylfa Sigurðsson,“ skrifar Adam Jones blaðamaður staðarblaðsins, Liverpool Echo um leik Everton og West Ham í gær.
„Íslenski landsliðsmaðurinn var gagnrýndur á síðustu leiktíð, hann hefur átt margar góðar frammistöður á þessu tímabili. Hann er að banka á dyrnar hjá Ancelotti um að komast í byrjunarliðið í deildinni.“
,,Frammistaða hans í gær var góð og stoðsendingin á Calvert-Lewin var snyrtileg. Hann sýndi styrk sinn þegar hann fékk sendinguna áður en hann kom boltanum í gegnum vörn West Ham.“
,,Miðjumaðurinn spilaði stórt hlutverk í seinni hluta leiksins til að tryggja sigur Everton.“
